โภชนสฺสาวสานสฺมิํ , โหติ สงฺฆาทิเสสตา;

ยกฺขาทีนํ จตุนฺนมฺปิ, ตเถว ปุริสสฺส จฯ

[2087]

ทนฺตกฏฺฐุทกานญฺจ, คหณุยฺโยชเน ปน;

เตสญฺจ ปริโภเคปิ, ทุกฺกฏํ ปริกิตฺติตํฯ

[2088]

ยกฺขาทีนํ ตุ เสสสฺส, คหณุยฺโยชเน ปน;

โภเค จ ทุกฺกฏํ, ภุตฺเต, ถุลฺลจฺจยมุทีริตํฯ

[2089]

‘‘นาวสฺสุโต’’ติ ญตฺวา วา, กุปิตา วา น คณฺหติ;

กุลานุทฺทยตา วาปิ, อุยฺโยเชติ จ ยา ปนฯ

[2090]

ตสฺสา อุมฺมตฺติกาทีน-มนาปตฺติ ปกาสิตา;

อทินฺนาทานตุลฺยาว, สมุฏฺฐานาทโย นยาฯ

ฉฏฺฐํฯ

[2091]

สตฺตมํ อฏฺฐมํ สงฺฆ-เภเทน สทิสํ มตํ;

สมุฏฺฐานาทินา สทฺธิํ, นตฺถิ กาจิ วิเสสตาฯ

สตฺตมฏฺฐมานิฯ

[2092]

นวเม ทสเม วาปิ, วตฺตพฺพํ นตฺถิ กิญฺจิปิ;

อนนฺตรสมาเยว, สมุฏฺฐานาทโย นยาฯ

นวมทสมานิฯ

[2093]

ทุฏฺฐโทสทฺวเยนาปิ, สญฺจริตฺเตน เตน ฉ;

ยาวตติยกา อฏฺฐ, จตฺตาริ จ อิโต ตโตฯ

สงฺฆาทิเสสกถาฯ

นิสฺสคฺคิยกถา

[2094]

อธิฏฺฐานูปคํ ปตฺตํ, อนธิฏฺฐาย ภิกฺขุนี;

วิกปฺปนมกตฺวา วา, เอกาหมฺปิ ฐเปยฺย เจฯ

[2095]

อรุณุคฺคมเนเนว, สทฺธิํ ภิกฺขุนิยา สิยา;

ตสฺสา นิสฺสคฺคิยาปตฺติ, ปตฺตสนฺนิธิการณาฯ

[2096]

เสโส ปน กถามคฺโค, ปตฺตสิกฺขาปเท อิธ;

สพฺโพ วุตฺตนเยเนว, เวทิตพฺโพ วินิจฺฉโยฯ

[2097]

ทสาหาติกฺกเม ตตฺถ, เอกาหาติกฺกเม อิธ;

ตสฺสิมสฺส อุภินฺนมฺปิ, อยเมว วิเสสตาฯ

ปฐมํฯ

[2098]

อกาเล จีวรํ ทินฺนํ, ทินฺนํ กาเลปิ เกนจิ;

อาทิสฺส ปน ‘‘สมฺปตฺตา, ภาเชนฺตู’’ติ นิยามิตํฯ

[2099]

อกาลจีวรํ ‘‘กาล-จีวร’’นฺติ สเจ ปน;

ภาชาเปยฺย จ ยา ตสฺสา, ปโยเค ทุกฺกฏํ สิยาฯ

[2100]

อตฺตนา ปฏิลทฺธํ ยํ, ตํ ตุ นิสฺสคฺคิยํ ภเว;

ลภิตฺวา ปน นิสฺสฏฺฐํ, ยถาทาเน นิโยชเยฯ

[2101]

กตฺวา วินยกมฺมํ ตุ, ปฏิลทฺธมฺปิ ตํ ปุน;

ตสฺส จายมธิปฺปาโย, เสวิตุํ น จ วฏฺฏติฯ

[2102]

อกาลวตฺถสญฺญาย, ทุกฺกฏํ กาลจีวเร;

อุภยตฺถปิ นิทฺทิฏฺฐํ, ตถา เวมติกายปิฯ

[2103]

กาลจีวรสญฺญาย, จีวเร อุภยตฺถปิ;

น โทสุมฺมตฺติกาทีนํ, ติสมุฏฺฐานตา มตาฯ

ทุติยํฯ

[2104]

จีวเรสุปิ พนฺธิตฺวา, ฐปิเตสุ พหูสฺวปิ;

เอกาเยว สิยาปตฺติ, อจฺฉินฺทติ สเจ สยํฯ

[2105]

ตถาจฺฉินฺทาปเน เอกา, เอกายาณตฺติยา ภเว;

อิตเรสุ จ วตฺถูนํ, ปโยคสฺส วสา สิยาฯ

[2106]

ติกปาจิตฺติ อญฺญสฺมิํ, ปริกฺขาเร ตุ ทุกฺกฏํ;

ติกทุกฺกฏมุทฺทิฏฺฐํ, อิตริสฺสา ตุ จีวเรฯ

[2107]

ตาย วา ทียมานํ ตุ, ตสฺสา วิสฺสาสเมว วา;

คณฺหนฺติยา อนาปตฺติ, ติสมุฏฺฐานตา มตาฯ

ตติยํฯ

[2108]

วิญฺญาเปตฺวา สเจ อญฺญํ, ตทญฺญํ วิญฺญาเปนฺติยา;

วิญฺญตฺติทุกฺกฏํ ตสฺสา, ลาภา นิสฺสคฺคิยํ สิยาฯ

[2109]

ติกปาจิตฺติยํ วุตฺตํ, อนญฺเญ ทฺวิกทุกฺกฏํ;

อนญฺเญนญฺญสญฺญาย, อปฺปโหนฺเตปิ วา ปุนฯ

[2110]

ตสฺมิํ ตญฺเญว วา อญฺญํ, อญฺเญนตฺเถปิ วา สติ;

อานิสํสญฺจ ทสฺเสตฺวา, ตทญฺญํ วิญฺญาเปนฺติยาฯ

[2111]

อนาปตฺตีติ ญาตพฺพํ, ตถา อุมฺมตฺติกายปิ;

สญฺจริตฺตสมา วุตฺตา, สมุฏฺฐานาทโย นยาฯ

จตุตฺถํฯ

[2112]

อญฺญํ เจตาเปตฺวา ปุพฺพํ, ปจฺฉา อญฺญํ เจตาเปยฺย;

เอวํ สญฺญายญฺญํ ธญฺญํ, มยฺหํ อาเนตฺวา เทตีติฯ

[2113]

เจตาปนปโยเคน, มูลฏฺฐาย หิ ทุกฺกฏํ;

ลาเภ นิสฺสคฺคิยํ โหติ, เตน จญฺเญน วาภตํฯ

[2114]

เสสํ อนนฺตเรเนว, สทิสนฺติ วินิทฺทิเส;

สมุฏฺฐานาทินา สทฺธิํ, อปุพฺพํ นตฺถิ กิญฺจิปิฯ

ปญฺจมํฯ

[2115]

อญฺญทตฺถาย ทินฺเนน, ปริกฺขาเรน ยา ปน;

เจตาเปยฺย สเจ อญฺญํ, สงฺฆิเกนิธ ภิกฺขุนีฯ

[2116]

ปโยเค ทุกฺกฏํ, ลาเภ, ตสฺสา นิสฺสคฺคิยํ สิยา;

อนญฺญทตฺถิเก เอตฺถ, นิทฺทิฏฺฐํ ทฺวิกทุกฺกฏํฯ

[2117]

เสสกํ อญฺญทตฺถาย, อนาปตฺตุปเนนฺติยา;

ปุจฺฉิตฺวา สามิเก วาปฺยา-ปทาสุมฺมตฺติกาย วาฯ

[2118]

สญฺจริตฺตสมา วุตฺตา, สมุฏฺฐานาทโย นยา;

สตฺตมํ ฉฏฺฐสทิสํ, สยํ ยาจิตกํ วินาฯ

ฉฏฺฐสตฺตมานิฯ

[2119]

อฏฺฐเม นวเม วาปิ, วตฺตพฺพํ นตฺถิ กิญฺจิปิ;

‘‘มหาชนิกสญฺญาจิ-เกนา’’ติ ปทตาธิกาฯ

[2120]

ทสเมปิ กถา สพฺพา, อนนฺตรสมา มตา;

สมุฏฺฐานาทินา สทฺธิํ, วิเสโส นตฺถิ โกจิปิฯ

อฏฺฐมนวมทสมานิฯ

ปฐโม วคฺโคฯ

[2121]

อติเรกจตุกฺกํสํ, ครุปาวุรณํ ปน;

เจตาเปยฺย สเจ ตสฺสา, จตุสจฺจปฺปกาสินาฯ

[2122]

ปโยเค ทุกฺกฏํ วุตฺตํ, ลาเภ นิสฺสคฺคิยํ มตํ;

กหาปณจตุกฺกํ ตุ, กํโส นาม ปวุจฺจติฯ

[2123]

อูนเก ตุ จตุกฺกํเส, อุทฺทิฏฺฐํ ทฺวิกทุกฺกฏํ;

อนาปตฺติ จตุกฺกํส-ปรมํ ครุกํ ปนฯ

[2124]

เจตาเปติ ตทูนํ วา, ญาตกานญฺจ สนฺตเก;

อญฺญสฺสตฺถาย วา อตฺต-ธเนนุมฺมตฺติกาย วาฯ

[2125]

เจตาเปนฺตํ มหคฺฆํ ยา, เจตาเปตปฺปเมว วา;

สมุฏฺฐานาทโย สพฺเพ, สญฺจริตฺตสมา มตาฯ

เอกาทสมํฯ

[2126]

ลหุปาวุรณํ อฑฺฒ- เตยฺยกํสคฺฆนํ ปน;

ตโต เจ อุตฺตริํ ยํ ตุ, เจตาเปติ หิ ภิกฺขุนีฯ

[2127]

ตสฺสา นิสฺสคฺคิยาปตฺติ, ปาจิตฺติ ปริยาปุตา;

อนนฺตรสมํ เสสํ, นตฺถิ กาจิ วิเสสตาฯ

ทฺวาทสมํฯ

[2128]

สาธารณานิ เสสานิ, ตานิ อฏฺฐารสาปิ จ;

อิมานิ ทฺวาทเสวาปิ, สมติํเสว โหนฺติ หิฯ

นิสฺสคฺคิยกถาฯ

ปาจิตฺติยกถา

[2129]

ลสุณํ ภณฺฑิกํ วุตฺตํ, น เอกทฺวิติมิญฺชกํ;

อามกํ มาคธํเยว, ‘‘ขาทิสฺสามี’’ติ คณฺหติฯ

[2130]

คหเณ ทุกฺกฏํ ตสฺสา, ปาจิตฺติ ยทิ ขาทติ;

อชฺโฌหารวเสเนว, ปาจิตฺติํ ปริทีปเยฯ

[2131]